ಸುಳಾದಿ (ಘ)
||ಧೃವತಾಳ||
ಘನದಯಾನಿಧಿಯಾದ ಪವನರಾಯನೆ ನಮೋ | ಪುನರಪಿ ನಮೋ ನಿನ್ನ ಪಾದ
ಸರಸಿರುಹಕೆ | ಮಣಿದು ಬೇಡಿಕೊಂಬೆ | ನೀನೇವೆ ಗತಿ ಎಂದು | ನಿನಗಿಂತ
ಹಿತರಾರು ಜೀವನಕೆ | ಸನಕಾದಿ ವಂದ್ಯನ್ನ ಅಜ್ಞಾನದಿಂದಲಿ ಪರಮ ಅಣುಗಳಲ್ಲಿ
ವ್ಯಾಪ್ತನಾಗಿ ಬಿಡದೆ | ಅಣುರೂಪಗಳಿಂದ ನಿಂದು ಮಾಡಿದ ಕೃತ್ಯ | ಮನಸಿಜ
ವೈರಿಯಿಂದ ತಿಳಿಯಲೊಶವೆ | ಹೀನ ಮನಸ್ಸಿನಿಂದ ಬದ್ಧನಾದವ ನಾನು |
ಗುಣರೂಪಕ್ರಿಯೆಗಳ ವಿದಿತನೇನೋ | ತನುವಿನೊಳಗೆ ಮೂರು ಕೋಟ್ಯಧಿಕ
ಎಪ್ಪತ್ತೆರಡು | ಎನಿಪ ಸಾಸಿರ ರೂಪದಿಂದ ಸತಿಯ ಸಹಿತ | ತೃಣ ಮೊದಲಾದ
ಜೀವ ಪ್ರಕೃತಿ ಕಾಲಕರ್ಮ | ಅನುಸಾರವಾಗಿ ಕ್ರಿಯೆಗಳನೆ ಮಾಡಿ | ಅನಿಮಿತ್ತ
ಬಾಂಧವನೆನಿಪ ಸಜ್ಜನರಿಗೆ ಜ್ಞಾನ ಭಕ್ತ್ಯಾದಿಗಳ ನೀನೆ ಇತ್ತು | ಮನದಲ್ಲಿ ಹರಿರೂಪ
ಸಂದರ್ಶನವಿತ್ತು | ಘನಿಭೂತವಾದ ಆನಂದದಿಂದ | ವಿನಯದಿಂದಲಿ ಪೊರೆವ
ಉಪಕಾರ | ವನು ಸ್ಮರಿಸಲಾಪೆನೆ ಎಂದೆಂದಿಗೆ ಗುಣ ನಿಧಿಯೆ | ಇನಕೋಟಿ ತೇಜ
ಗುರು ವಿಜಯ ವಿಠಲರೇಯ | ಇನಿತು ನಿನ್ನೊಳು ಲೀಲೆ ಮಾಡುವ ಆವಕಾಲ ||