ಬಹುದಿನಗಳಿಂದ ಕಾಡುತ್ತಿತ್ತೆನ್ನನು ಒಂದು ಪ್ರಶ್ನೆ - ಹೆಣ್ಣೆಂದರೇನು ?
ಕವಿಪುಂಗವರ ವರ್ಣನೆಯ ಕೋಗಿಲೆಯ ಕಂಠದಲಿ
ಅವಳು ಸಿಗಲಿಲ್ಲ
ನಾಟ್ಯಗಂಧರ್ವರ ನವಿಲಿನ ನಡಿಗೆಯಲ್ಲಿ
ಅವಳು ದೊರಕಲಿಲ್ಲ
ಬೇಲೂರ ಶಿಲಾಬಾಲಿಕೆಯೂ ಕಾಳಿದಾಸನ ಶಕುಂತಲೆಯೂ
ನನಗೆ ಹೆಣ್ಣಾಗಿ ಕಾಣಲಿಲ್ಲ
ಹೆಣ್ತನವೆಂದರೆ ಕಿತ್ತೂರು ಚೆನ್ನಮ್ಮನ ಶೌರ್ಯ ಮಾತ್ರವೇ?
ಅಥವಾ ಕುಂತಿಯ ವಾತ್ಸಲ್ಯ ಮಾತ್ರವೇ?
ನನಗಂತೂ ಹಾಗನಿಸುತ್ತಿಲ್ಲವಲ್ಲ
ಮಣ್ಣು ಹೊನ್ನಿನೊಡನೆ ಹೆಣ್ಣನ್ನು ಸೇರಿಸಿ
ಆಕೆಯನ್ನು ನಿರ್ಜೀವವಾಗಿಸಿಹೆವು ನಾವು
ಮಾತೃತ್ತ್ವ ದೈವತ್ತ್ವಗಳ ಗುಣಗಳಲ್ಲಿ
ಆಕೆಯನ್ನು ಬಂಧಿಸಿಹೆವು ನಾವು
ಶೃಂಗಾರ ಕಾಮಗಳ ಉಪಾಸನೆಯಲ್ಲಿ
ಆಕೆಯನ್ನು ಸ್ಥನಜಘನಗಳ ಮಾಂಸದ ಮುದ್ದೆಯಾಗಿಸಿಹೆವು ನಾವು
ನನ್ನ ದೃಷ್ಟಿಯಲ್ಲಿ ಹೆಣ್ಣೆಂದರೆ
ತಾಯಿ-ಮಗಳು-ಅಕ್ಕ-ತಂಗಿ-ಪ್ರೇಯಸಿ-ಪ್ರಿಯತಮೆ
ಇವಿಷ್ಟೇ ಅಲ್ಲದ, ಗಂಡಿನಂತೆಯೇ, ಅಥವಾ
ಗಂಡಿನಂತಲ್ಲದ ಅಥವಾ ಬರೀ ಗಂಡಿನೊಡನೇ ಹೋಲಿಕೆಯೇಕೆ?
ಒಂದು ಸ್ವತಂತ್ರ ವ್ಯಕ್ತಿ ಎಂದರೆ ಸಾಲದೇ?
ಗುಹ (ಗುರಪ್ಪ ಹರೀಶ)೧೯೯೪